Johnny Rockets Kuwait charges 1 slice of Lemon!!

 

خلال زيارتي لجوني روكيتس في مارينا كريسنت قبل فترة..طلبنا اوردر.. و المشروب كان كولا مع شريحة ليمون

أكلنا الحمدلله وخلصنا و صار وقت الحساب ..تفاجأت عند احضار الفاتورة بأن شريحة الليمون سعرها 250 فلس !!!! ليش شصاير بالدنيا؟؟

هل يعقل؟؟

 اذا صندوق ليمون كامل بالجمعية ينباع بسعر تقريبي ما بين 800 فلس الى دينار.. شلون شريحة وحدة تصير بربع دينار؟ لو ليمونة كاملة ما قلت شي بس سلايس وحدة!!

 باجي المطاعم يحطونها مجاناً مع المشروب عند الطلب..وانتوا ربع دينار؟ الغش ورفع الأسعار لي متى؟؟ ولي متى الواحد بيصير مغفل وبيسكت عن هالسوالف؟

لو قايل لي الويتر ان سعر الشريحة بربع دينار ممكن أكنسل الموضوع! لكن يضيفونها و بدون توعية الزبون و تالي انصدم بالفاتورة ان حاسبين حساب شريحة ليمون بربع دينار؟؟

أنا ما همتني الفلوس ولكن المسألة مبدأ.. مو معنى ان وزارة التجارة منعت تاخذون من الزباين السيرفس تشارج (ضريبة الخدمة) يعني تروحون و ترفعون أسعاركم من ناحية ثانية و تضيفون اسعار خيالية على أشياء بسيطة و مجانية في الغالب!!

وهذه الفاتورة و دليل كلامي

 

 

 

من اليوم و رايح اذا بطلع مطعم ضروري أحط ليمونة بجنطتي تحسبأً لمثل هالسوالف !!

والظاهر إني بحط أكس كبير على جوني مثل بعض المطاعم الثانية اللي رفعت أسعارها فجأة بعد قرار وزارة التجارة

ومني للمسئولين!